Грб на Меѓународен Славјански Универзитет
Грбот на Меѓународен Славјански Универзитет е изработен во македонска верзија со кирилично писмо и во англиска верзија со латинично писмо. Грбот може да се прилагодува и за други јазици, со превод на содржината на текстот.
Грбот на МСУ (македонска верзија) е во тркалезна форма и во средината на кругот е позициониран штит во кој е претставена зградата на универзитетот во Свети Николе и годината на основање на универзитетот – 2004. Во кругот е содржан натпис МЕЃУНАРОДЕН СЛАВЈАНСКИ УНИВЕРЗИТЕТ СВ. НИКОЛЕ. На англиската верзија од логото е содржан натпис INTERNATIONAL SLAVIC UNIVERSITY ST. NICHOLAS и годината на основање е означена како Est. 2004.
Боите кои се користат за грбот се црвената #d30212, белата #ffffff и црната #000000, односно темно сива #252525. Грбот може да биде изработен и во една или две бои за специфични ситуации.
Меморандум на Меѓународен Славјански Универзитет
Знаме на Меѓународен Славјански Универзитет
Знамето на МСУ е изработено во македонска верзија со кирилично писмо и во англиска верзија со латинично писмо. Грбот може да се прилагодува и за други јазици, со превод на содржината на текстот.
Знамето на МСУ е со правоаголна форма во бела боја. На средината се наоѓа елемент од грбот на МСУ – штитот со зградата на МСУ, годината на основање и називот. Елементот од грбот на МСУ е во две бои – црвена и црна.
Може да се користи и двобојна верзија од знамето во која позадината е со црвена боја, а елементот од грбот на МСУ е со бела боја и обратно.
Знамето на МСУ постојано е истакнато на објектот на Ректоратот на МСУ и на објектите на единиците и на придружните членки.
Знамето на МСУ се истакнува по повод патрониот празник на МСУ, на прослави, свечености и други активности, кои се од значење за МСУ и единиците, а може да се истакне при одржување на меѓународни универзитетски средби, натпревари и други собири во согласност со правилата и практиката на одржувањето на тие собири, како и при спортски натпревари и други спортски активности на МСУ и на единиците.
Студентска химна на Меѓународен Славјански Универзитет
Химната на универзитетот е напишана од Лазар Цветковски, а изведувачи се познатите македонски пејачи Димитар Андоновски и Дарко Илиевски, кои се наши (веќе дипломирани) студенти.
Химната на МСУ се изведува на прослави, промоции и други свечени и спортски манифестации на МСУ и на единиците и придружните членки, при меѓународни универзитетски средби и други собири во согласност со правилата и практиката на одржувањето на тие собири. Химната се изведува и на свечености организирани од универзитетот како врачување дипломи и индекси, на промоции, културни настани итн. Се користи и во промотивните видеа за универзитетот, како и за секој факултет посебно.
Плакета на Меѓународен Славјански Универзитет
Плакетата се доделува на заслужни правни и физички лица, кои со својата работа дале посебен придонес за развојот на МСУ во областа на наставно-образовната, научно-истражувачката и уметничката дејност.
Поблиски одредби за доделување плакета и повелба донесува Ректорската управа.
Патронен празник на Меѓународен Славјански Универзитет
Патрониот празник на МСУ е 19 декември. Секоја година патрониот празник се одбележува со посебна свечена програма која се одржува на една од единиците на МСУ.
Во свечената програма земаат учество и студентите на МСУ и на тој ден не се изведува настава.
Програмата за патрониот празник се подготвува и уредува од Институтот за култура и уметност.
Инсигнии на Меѓународен Славјански Универзитет
МСУ има посебни инсигнии за ректорот, проректорот, деканите и продеканите.
Ректорските и проректорските инсигнии се состојат од пет меѓусебно поврзани гравури, а на централната гравура е поставен грбот на МСУ.
Деканските и продеканските инсигнии се разликуваат зависно од факултетот и се состојат од три меѓусебно поврзани гравури, а на централната гравура е поставен грбот на МСУ.
Ректорски и проректорски инсигнии
Декански и продекански инсигнии
Одора на Меѓународен Славјански Универзитет
Одората се карактеризира со бордо боја со декорации и везови во златна боја кои започнуваат од предната страна и преку рамениците се протегаат до грбот. Основата на одората е иста за ректорот, проректорите, деканите и продеканите.
На ректорската одора има правоаголен додаток во златна боја кој служи како подлога за инсигниите. На проректорската, деканската и продеканската одора се додаваат само инсигниите.
Одората се користи при свечени настани на МСУ, прослави, промоција на нови генерации, претставување на МСУ или единиците на меѓународни и меѓууниверзитетски средби и слични активности.
Слогани на Меѓународен Славјански Универзитет
- Живеј ја својата визија (2015)
- Студирајте на Славјански денес за да го освоите светот утре (2016)
- Мојата визија. (2018)
- 2 децении. 1 визија. (2024)