Започна шестиот Новогодишен фестивал и базар на Меѓународен Славјански Универзитет и Киноверзум. Базарот започна на 22.12.2022 (четврток) и ќе се одржува и во наредните два дена 23.12.2022 (петок) и 24.12.2022 (сабота).

Она што годинава го понудивме за првпат е едно сосема ново уметничко искуство. Една од салите на Киноверзум беше претворена во голем леден тунел во кој се одржува базарот. На површина од 150 метри квадратни, околу 20 лица работеа на целосна трансформација на салата, при што се користеа разни техники на осветлување за да се постигне ефектот на ледена сала. Во ледениот тунел се сместени околу 25 штандови со ракотворби.

Годинава, со околу 40 штандови, гостуваат ракотворци од Скопје, Велес, Свети Николе, Битола, Штип, Кочани, Пробиштип. Вкупно 10 од штандовите се распоредени во дрвени куќички, а другите се распоредени во ледената сала и во Киноверзум Lounge Bar.

Имаме повеќе фото-зони, од кои најпопуларни се санката на Дедо Мраз, и секако – автомобилот на Мистер Бин – кој се наоѓа во Киноверзум. На првиот ден на базарот во игротека Оскар не посети и Дедо Мраз за фотосесија со најмалите, а планирано е да гостува и денес и утре. Имавме и кратки сесии на читање на новогодишни приказни со Дедо Мраз, цртање на лице, а во сабота имаме новогодишни детски забави за кои веќе сите места се резервирани.

За најмалите во Киноверзум го прикажувавме анимираниот филм Биби и Боби во Снешковград, а за повозрасната публика – второто продолжение на Аватар – Патот на водата.

Во пресрет на Новогодишните празници, посетителите можат да одберат уникатен подарок за своите најблиски, како и да го посетат нашето кино и да ги гледаат најновите филмски хитови, да се засладат со шеќерна волна и да се згреат со варено вино.

Денес во 18:00 часот во Киноверзум во Свети Николе ќе биде одиграна монодрамата „Петте фази на преболувањето“ со Наташа Митев, по сценарио на Ненад Јованов. Влезот за монодрамата е бесплатен.

Институтот за култура и уметност и Меѓународен Славјански Универзитет ја организираат уметничката работилница „Зимска бајка” на која можете да научите како да насликате зимски пејзаж на платно со акрилни бои. Работилницата започнува вечерва од 19.00 часот во Киноверзум Lounge Bar – Свети Николе.

Ве очекуваме!