Претседателот на Управен одбор на Меѓународен Славјански Универзитет, проф. д-р Јордан Ѓорчев, на 9. април 2024 година донираше 12 уметнички дела на две јавни здравствени установи во Велес. Оваа значајна донација, која вклучува слики од поставката од неговата последна изложба „Храбриот нов свет“, ќе го разубавува просторот на Општата болница Велес и Специјализираната болница за белодробни заболувања „Јасеново“.

Уметничките дела беа врачени на Јасмина Матева, директорка на Специјализираната болница „Јасеново“ и д-р Зоран Арсовски, директор на Општа болница Велес, кои во име на јавните здравствени установи се заблагодарија за донацијата. На настанот присуствуваше и Ангел Коруновски, директор на Народен Музеј Велес.

Покажувајќи дека уметноста и образованието се силни алатки за создавање на позитивни промени во општеството, проф. д-р Ѓорчев со овој чин ја демонстрираше својата посветеност кон поддршка на локалната заедница. Истовремено ја истакна важноста на оптимизмот во процесот на лекување, со надеж дека ќе има големо значење за подобрување на општото чувство на пациентите и вработените. Оваа донација истовремено ги одразува придонесите на Меѓународен Славјански Универзитет кон општествената одговорност.

Уметничките дела ќе бидат поставени во двете јавни здравствени установи од четврток, 11 април. Вредноста на уметничките дела, проценета на над 10 илјади евра, говори за несебичноста и желбата за придонес кон подобрувањето на животниот стандард во нашата заедница. Нашиот универзитет секогаш ќе стои зад вакви значајни иницијативи и ќе продолжи да ги поддржува ваквите активности кои покажуваат дека образованието и уметноста можат да имаат огромно влијание врз општественото добро.