Во Њу Делхи во Индија во седиштето на Индиско здружение за техничко образование беше остварен состанок помеѓу претставници од Меѓународниот Славјански Универзитет, раководството на Индиско здружение за техничко образование и раководството на Здружението за соларна енергија на Индија. На средбата присуствуваа:

• д-р Пратапсин Десаи, претседател на Индиското здружение за техничко образование
• д-р Прафула Патанк, претседател на Здружението за соларна енергија на Индија
• д-р  Чандрас Ханда, претседател на Комитетот за интернационализација на Индиското здружение за техничко образование
• м-р Михаела Ѓорчева, член на Управен одбор при Меѓународен Славјански Универзитет
• Иван Спасев, член на Управен одбор при Меѓународен Славјански Универзитет
• д-р Виџај Ваидја генерален секретар на Индиското здружение за техничко образование
• д-р С. М. Али, проектен координатор на Индиското здружение за техничко образование

За време на средбата која се одржа на 26 март 2023, претставниците разговараа за потенцијалните можности за соработка за заеднички развој и партнерство. Главната цел на средбата е Меѓународниот Славјански Универзитет заедно со индиски универзитети да основа нов современ кампус за технички факултет како дел од Регионалниот центар за образование на МСУ во Свети Николе. Фокусот на овој кампус ќе биде на студии и истражувања од областа на компјутерските науки, вештачката интелигенција и обновливите извори на енергија.

Дополнително, претставниците разговараа за различни иницијативи кои би можеле да се преземат во соработка, вклучително и програми за размена на студенти, студентска пракса во двете земји, основање на канцеларија на Индиско здружение за техничко образование во кампусот на Меѓународниот Славјански Универзитет, како и формирање на инфо центар на МСУ во седиштето на Индиското здружение за техничко образование во Њу Делхи.

Двете страни разговараа и за можноста за организирање меѓународни конференции во кампусот на Меѓународниот Славјански Универзитет во соработка со Индиското здружение за техничко образование.

Во Индиското здружение за техничко образование членуваат преку 2.700 универзитети од Индија, повеќе од 128.000 професори и повеќе од половина милион студенти. Здружението за соларна енергија на Индија е дел од Меѓународното здружение за соларна енергија со седиште во Германија.