На свечен настан во Свети Николе во просториите на Mayberry Highway, дел од кампусот на Меѓународен Славјански Универзитет, се одржа првата официјална средба по основањето на Балканскиот универзитетски центар, формиран во Велико Трново од страна на девет универзитети од регионот. Домаќин на настанот беше проф. д-р Христо Бонџолов, претседател на Балканскиот универзитетски центар и проректор за меѓународна соработка на Великотрновски универзитет „Св. св. Кирил и Методиј”, Бугарија.

Средбата беше комбинирана – со физичко и онлајн учество, што овозможи вклучување на ректорите, проректорите и останатите претставници од партнерските универзитети – основачи на Балканскиот универзитетски центар. Присутни беа претставници од универзитети од Албанија, Бугарија, Грција, Романија, Северна Македонија и Србија, нагласувајќи ги заедничките цели за подобрување на квалитетот на образованието и истражувањето преку здружување на ресурсите и споделување знаења. На средбата имаше претставници од:

• Великотрновски универзитет „Св. св. Кирил и Методиј”, Бугарија
• Меѓународен Славјански Универзитет, Република Северна Македонија
• Универзитетот во Ниш, Србија
• Универзитетот во Крајова, Романија
• Европскиот политехнички универзитет, Бугарија
• Висока градежна школа „Љубен Каравелов“, Бугарија
• Универзитетот на Западна Македонија, Грција
• Универзитетот „Фан С. Ноли“, Албанија

Беше презентиран нацрт-планот за работа на центарот во кој фокусот е ставен на поттикнување на соработката и создавање на нови можности за студентите и професорите на сите универзитети кои членуваат преку учество во прекугранични програми и размена, како и промовирање на заеднички истражувачки проекти.

Оваа средба е резултат на заедничките напори за подобрување на меѓународната соработка и подобрување на академските стандарди во регионот. Освен што ќе се зголемуваат академските ресурси и можности, задача на Балканскиот универзитетски центар ќе биде да подготвува и заеднички проекти финансирани од Европската Унија за подобрување квалитетот на образованието.