На 26-ти мај со почеток од 13:00 часот на Меѓународен Славјански Универзитет „Г. Р. Державин“ во Свети Николе се одржа прес-конференција во врска со почнувањето со работа на филијалата на Универзитетот од Велико Трново „Св. св. Кирил и Методиј“ во рамки на Меѓународен Славјански Универзитет „Г. Р. Державин“.

На прес-конференцијата за соработката зборуваа претседателот на Управен Одбор на Меѓународен Славјански Универзитет „Г. Р. Державин“, проф. д-р Јордан Ѓорчев и ректорот на Великотрновскиот универзитет „Св. св. Кирил и Методиј“ проф. д-р Христо Бонџолов.

Започнувањето со работа на филијалата на Великотрновскиот универзитет „Св. св. Кирил и Методиј“ при Меѓународен Славјански Универзитет „Г. Р. Державин“ се темели исклучиво на долгогодишна соработка помеѓу двата универзитети.

Соработката помеѓу нашите два универзитети трае околу 8 години и со текот на годините заедничките активности се интензивираа и таа соработка се продлабочуваше. Пред 3 години (во 2018 година) се одлучивме уште повеќе да ја продлабочиме нашата соработка со што беше предвидено Великотрновскиот универзитет „Св. св. Кирил и Методиј“ да започне со работа како странска високообразовна установа во рамките на МСУ. Ова е само првиот чекор на продлабочената соработка, и во иднина очекуваме да соработуваме и на други полиња.

Барањето за започнување со работа како странска високообразовна установа беше поднесено во 2018 година, a деновиве беше донесена Одлуката за одобрение за вршење на високообразовна дејност на Великотрновскиот универзитет „Св. св. Кирил и Методиј“ од страна на Владата на Република Северна Македонија. Сепак, со ова целата работа не е завршена, затоа што сега на ред е Министерството за образование на Република Бугарија кое треба да даде согласност за оваа програма.

Планот e Великотрновскиот универзитет „Св. св. Кирил и Методиј“ да започне со работа во рамките на МСУ со три последипломски студиски програми со настава на англиски јазик:

• Англиски јазик
• Регионален развој
• Информатика

На секоја од програмите е планирано да се запишат по 20 студенти. Интерес за упис на програмите постои и од нашите други соседни држави и токму затоа беше одлучено програмите да бидат достапни во Република Северна Македонија.

Ова не е прво партнерство за Меѓународниот Славјански Универзитет „Г. Р. Державин“ кое се однесува на студиски програми. Имено, МСУ има три партнерски универзитети со кои има соработувано за студиски програми:

• Тамбовскиот државен универзитет „Г. Р. Державин“ од Русија со кој работиме од самиот почеток
• Економскиот факултет при Универзитетот во Љубљана
• Великотрновскиот универзитет „Св. св. Кирил и Методиј“ од Велико Трново

Соработката помеѓу универзитетите во светски рамки не е ништо ново – современите универзитети соработуваат меѓусебно при што се создава уникатна синергија и додадена вредност од која придобивки имаат сите засегнати страни. Иднината на нашите универзитети не е во самостојноста, но во обединувањето – во европските конзорциуми.

Проф. д-р Христо Бонџолов изјави: „За да бидат универзитетите конкурентни, тие треба да се обединуваат и да соработуваат. Со или без филијала ние работиме заедно, но подобро е кога таа соработка се официјализира. Нашата соработка не пречи никому. Оние универзитети кои сакаат можат да работат заедно. Многу е тешко самостојно да се справиме (со конкуренцијата). Ние во Република Северна Македонија ќе понудиме само 3 студиски програми на последипломски студии од вкупно 125 кои ги има Великотрновскиот универзитет на последипломските студии, 74 на додипломските и 64 на докторските студии во 17 научни области.“.

„Великотрновскиот универзитет е голем државен универзитет. Ние ги најдовме нашите партнери. Се разбира, ние имаме многу договори за соработка со други универзитети, имаме околу 500 договори во рамките на Еразмус+, имаме 118 билатерални договори. Но, договорите што реално функционираат се малку, затоа што за функционалните договори на почетокот се бара едно нешто. Се бара доверба, се бара пријателство и се бара помеѓу нас да нема црвени линии. Да седнеме, да се договориме и да работиме заедно. И тогаш да постигнеме резултати.“ – продолжи проф. д-р Христо Бонџолов.

„Ние се откажавме од тоа да ја направиме нашата прва задгранична филијала во Виена, Австрија. Имаме регистрирано програма на последипломски студии на германски јазик во Агенцијата за акредитација во Австрија и Великотрновскиот универзитет има адреса во Виена. Не ја направивме првата филијала таму, но ја направивме тука. Не само затоа што е кај пријатели, но и за тоа што работата се покажа како покорисна. Ние видовме дека овде има поголема смисла, повеќе можности. Само за неколку години од нашата соработка имавме повеќе од 50 пријавени докторанди на нашите програми. Таква соработка немаме со ниту еден друг универзитет. Овде има огромни можности за проекти, за научно-истражувачка работа, за развој. Ние се надополнуваме како универзитети. Како што гледате, ние не предлагаме програми кои би биле во конкуренција со постоечките. Нашата намера не е да отвориме програми кои веќе ги има овде. Токму во тоа дополнување е смислата – заедно да бидеме посилни.“ – проф. д-р Бонџолов го заврши своето излагање.