На 21.03.2023 во Велико Трново со потпишување на меморандум беше основан Балканскиот универзитетски центар. Потписници на меморандумот и основачи на Балканскиот универзитетски центар се 9 универзитети од Албанија, Бугарија, Грција, Романија, Северна Македонија, Србија и Турција. Меморандумот беше потпишан во седиштето на Великотрновскиот универзитет „Св. св. Кирил и Методиј” во Велико Трново, Бугарија.

Балканскиот универзитетски центар има за цел да ја поттикне соработката меѓу универзитетите од различни балкански земји, да го подобри квалитетот на образованието и истражувањето во регионот преку здружување ресурси и споделување знаења. Овој заеднички напор ќе создаде можности за студентите и професорите да се вклучат во прекугранична соработка и програми за размена, овозможувајќи им пристап до поширок опсег на академски и истражувачки ресурси. Центарот ќе промовира и заеднички истражувачки проекти, охрабрувајќи го развојот на нови идеи и решенија за справување со регионалните и глобалните предизвици.

На потпишувањето на меморандумот од Меѓународен Славјански Универзитет присуствуваа претседателот на Управен одбор на МСУ, проф. д-р Јордан Ѓорчев, заменик претседателот на Управен одбор на МСУ, м-р Борче Серафимовски  и проф. д-р Ленче Петреска, ректорка на МСУ. Меморандумот беше потпишан од следниве универзитети – основачи на Балканскиот универзитетски центар и нивните ректори:

• Великотрновски универзитет „Св. св. Кирил и Методиј”, Бугарија – проф. д-р Христо Бонџолов;
• Меѓународен Славјански Универзитет, Република Северна Македонија – проф. д-р Ленче Петреска;
• Универзитетот во Ниш – Србија, проф. д-р Драган Антиќ;
• Универзитетот во Крајова – Романија, проф. д-р Цезар Јонут Спину;
• Универзитетот „Намик Кемал“ , Турција – проф. д-р Мумин Шахин;
• Европскиот политехнички универзитет,  Бугарија – проф. д-р Марин Маринов;
• Висока градежна школа „Љубен Каравелов“,  Бугарија – доц. д-р Анита Хандрулева;
• Универзитетот на Западна Македонија, Грција – проф. д-р Теодорос Теодулидис и
• Универзитетот „Фан С. Ноли“, Албанија – проф. д-р Димитар Бело.

Целите поставени за Балканскиот универзитетски центар се поврзани со развој на проекти и учество во програми за стимулирање на образованието, за подобрување на материјалната база и за создавање на најдобри можни услови за обезбедување образовна услуга со највисок квалитет, како и за аплицирање до структурите на Европската Унија во рамките на различни програми за финансирање на образованието и науката.

Дополнително, формирањето на Балканскиот универзитетски центар покажува посветеност на меѓународна соработка и партнерство на академската област. Со здружување на универзитети од различни земји, центарот ќе поттикне меѓусебно разбирање, ќе придонесе за градење доверба и попросперитетен регион.