На 16 март 2026 година, во просториите на Меѓународен Славјански Универзитет во Свети Николе беше потпишан договор за соработка помеѓу Меѓународен Славјански Универзитет и НУ Завод и Музеј – Штип. Договорот беше потпишан од страна на претседателот на Управниот одбор на Меѓународен Славјански Универзитет, проф. д-р Јордан Ѓорчев, и в.д. директорот на НУ Завод и Музеј – Штип, Марија Причкова Митева.

Со потпишувањето на овој договор двете институции воспоставија соработка насочена кон развој на образовни, научни и културни активности, како и кон унапредување на практичните знаења и искуства на студентите. Во рамки на договорената соработка беа предвидени активности кои овозможуваат студентите на Меѓународен Славјански Универзитет да имаат поволности при посета на музејските поставки и културно-историските содржини под надлежност на НУ Завод и Музеј – Штип, како и можности за учество во културни и образовни настани.

Соработката предвидуваше можност студентите на Меѓународен Славјански Универзитет да реализираат практична настава во рамки на НУ Завод и Музеј – Штип, со што ќе стекнуваат практични знаења и искуства поврзани со културното наследство, музејската дејност и сродните области. Воедно, беше предвидено и организирање на стручни едукативни посети на културно-историски локалитети под надлежност на институцијата, со стручно водство.

Во рамки на договорот беа опфатени и можности за реализација на заеднички едукативни активности и развој на професионална и институционална соработка помеѓу двете институции, како и взаемни поволности и поддршка при организација на настани и активности.

Со воспоставувањето на оваа соработка се создадоа нови можности за продлабочување на врската помеѓу академската заедница и институциите од областа на културата и заштитата на културното наследство, како и за збогатување на образовниот процес преку практични искуства и заеднички активности.