На 15 мај 2023 година учениците од осмо одделение од ОУ „Св. Кирил и Методиј“ – Битола беа во посета на Меѓународен Славјански Универзитет. Учениците имаа можност во амфитеатарот пред студентите од Факултетот за психологија да ги претстават своите таленти со изведба на сцени од драмата „Бегалка“.

Студентите и учениците под ментортво на училишниот психолог Жанета Ристевска и доц. д-р Горица Поповска – Налевска имаа можност да учествуваат во дискусија во однос на работата со талентирани ученици. На работилницата беа прикажани проектите со надарени и талентирани ученици од училиштето.

Студентите од втора година имаа можност да посетуваат едномесечна практична настава во ОУ „Св. Кирил и Методиј“ под менторство на училишниот психолог Жанета Ристевска. Во текот на практичната настава студентите се запознаа со сите домени на работа на училишниот психолог, а воедно активно учествуваа и во подготовката на активностите со талентирани ученици.

Преку драматизацијата не само што се негува љубовта кон пишаниот збор и талентите во областа на сценската уметност, но се овозможи учесниците да навлезат во една подлабока психолошка анализа на ликовите и подобро разбирање на меѓучовечките односи во реалниот живот.