Михаела Ѓорчева, заменик претседател на Управен Одбор на Меѓународен Славјански Универзитет и основач на Киноверзум, учествуваше како говорничка на пленарната сесија со наслов „Иновации со родова перспектива: Градење инклузивна иднина“, во рамки на 30. Самит за партнерства организиран од Конфедерацијата на индиската индустрија, кој се одржа во Вишакапатнам, Андра Прадеш, Индија.

На сесијата, Ѓорчева беше дел од истакнат панел на кој зборуваше и г-ѓа Гумади Сандја Рани, министерка за благосостојба на жените и децата при Владата на индиската сојузна држава Андра Прадеш, како и панелистки од Индија и Канада со експертиза во областа на женското претприемништво.

Говорејќи од своето професионално искуство како претприемач и активен член на академската заедница, Михаела Ѓорчева сподели конкретни увиди за улогата на жените во менаџментот, индустријара и претприемништвото. Заедно со останатите панелистки, преку компаративни примери од Македонија и Индија, се отвори значајна дебата за глобалните предизвици и можности во создавањето на поинклузивни економии и општества.

Фокусот на сесијата беше ставен на улогата на образованието, вештачката интелигенција, дигиталните технологии и меѓусекторската соработка како клучни алатки за унапредување на родовата еднаквост и овозможување на поголема вклученост на жените во процесите на иновација и креирање политики.

Сесијата беше модерирана од Мурали Кришна Ганамани, претседател на огранокот на Конфедерацијата на индиската индустрија на Андра Прадеш.