На 29 септември 2025 година, во просториите на Чандигар Универзитетот во Индија свечено беше отворен 5. Глобален образовен самит – платформа од високо академско значење, која обединува над 60 ректори, проректори и директори од повеќе од 50 реномирани универзитети, претставници од 35 земји од сите континенти.

Темата на самитот оваа година е: „Глобални соработки за обликување на иднината на високото образование – создавање инклузивни и одржливи нации, поддржани од вештачка интелигенција и технологија“, и претставува важен чекор во насока на реосмислување на високото образование и неговата улога во иднината на одржливи и инклузивни општества.

Проф. д-р Јордан Ѓорчев, претседател на Управниот одбор на Меѓународен Славјански Универзитет, беше дел од главните говорници и истакнат почесен гостин на настанот. Во рамките на свеченото отворање, тој одржа говор пред меѓународната академска заедница, по што му беше врачена почесна плакета како признание за неговиот придонес во интернационалната академска соработка.

Проф. Ѓорчев, исто така, претседаваше со втората тематска сесија на самитот под наслов „Вештачка интелигенција за инклузија и одржливост“, во која учествуваа реномирани говорници од Северна Ирска, Канада, Шведска, Тајланд, Унгарија, Јужна Африка, Гана, Австралија, Малезија, Филипини и САД. Самитот беше свечено отворен во присуство на амбасадорот на Кралството Шпанија во Индија, кој во своето обраќање ги поздрави учесниците.

Учеството на Меѓународен Славјански Универзитет на оваа значајна меѓународна платформа претставува нова потврда за заложбата на Универзитетот кон градење на глобални партнерства, интернационална соработка и активно вклучување во процесите што го обликуваат високото образование на иднината.