Излезе од печат книгата „УЧЕЊЕ И ПОУЧУВАЊЕ, педагошко-психолошки аспекти “ од доц. д-р Горица Поповска Налевска. Издавач е нашата официјална издавачка куќа – Меѓународен центар за славјанска просвета.

Современото живеење со сите свои предизвици, често условува неопходни промени во областа на воспитанието и образованието. Соочувањето со потребните промени предизвика потреба од преиспитување на многу нешта во наставата: изборот и структурата на наставните програми и содржини, доминантоста на одделните цели и задачи, изборот, зачестеноста и продуктивноста на одделните наставни форми и методи, ограничената иницијатива слобода и мотивација на учениците во наставата, стилот на работа на наставникот и потребата од градење демократски и инклузивни односи, градењето на вредности и потребата од зајакнување на свеста кај младите за значењето на процесот на учење, потребата од постојано професионално и перманентно усовршување на просветните работници.

Учењето е сложен процес што се одвива според одредени педагошко – психолошки законитости и правила кои мора да се почитуваат доколку се сака да се постигне успех, односно ако се сака процесот на учење да резултира со продукција на нови квалитетни информации и знаења. Со учењето не само што доаѓаме до знаење или вештини, туку и учиме како да мислиме, помниме, чувствуваме и да бидеме личност со одредена структура.

За авторот, психолошките и педагошките научни аспекти сами по себе поставуваат соодветни компетенции на сите учесници во овој процес (професори, ментори, студенти), како и определени системски, организациски и нормативни решенија кои се насочени кон унапредување на современите трендови и промени на традиционалната парадигма на учење.

Авторот на публикацијата се обидел психологијата и педагогијата да ги постави во научна рамка и тоа преку веќе постоечките теориски процеси, нивното појавување, прокламирање, но и обид за ново (пре)структуирање, обликување, трансформирање за да изнајде начин како да ги поттикне студентите, наставниците, менторите да откријат нови платфоми, хоризонти за научниците, индивидуите да даваат се од себе во „современото“ учење и подучување.

Рецензенти на ракописот се проф. д-р Соња Ризоска Јовановска, Факултет за психологија, МСУ „Г. Р. Державин“ Свети Николе – Битола и проф. д-р Сашо Кочанковски, Факултет за психологија, МСУ „Г. Р. Державин“ Свети Николе – Битола.