На 26 февруари 2026 година беше реализирана студиска посета на Централниот регистар на Република Северна Македонија од страна на студенти од Факултетот за правни науки и Факултетот за економија и организација на претприемништво при Меѓународен Славјански Универзитет. Посетата се одржа во рамки на наставата по предметот Трговско право и им овозможи на студентите непосредно запознавање со работата и улогата на институцијата во правниот и економскиот систем на државата.

Во рамки на посетата, студентите беа придружувани од доц. д-р Елена Стојанова Златева, која заедно со групата студенти имаше можност одблиску да се запознае со процесите, надлежностите и значењето на Централниот регистар во регулирањето на трговските субјекти и деловното опкружување.

За време на посетата беше остварена средба и со директорката на Централниот регистар, при што се разговараше за можностите за идната соработка помеѓу институциите. Во разговорите беа разгледани потенцијални активности насочени кон продлабочување на практичната едукација на студентите и развој на заеднички иницијативи кои ќе придонесат за поврзување на академската заедница со релевантните институции.

Оваа посета претставуваше значаен чекор кон зајакнување на практичната настава и создавање можности за студентите на Меѓународен Славјански Универзитет да стекнат директни искуства и знаења од институции кои имаат клучна улога во правниот и економскиот систем на државата.