Во периодот од 13.04 до 21.04.2014, во местото Мулет – Тирана,  тројца студенти од Факултетот за економија и организација на претприемништвото при МСУ, учествуваат во проект „Убавината во различностите“, – “Beauty in variety”. Иницијатор за учеството на наши студенти е проф. д-р Шеќеринка Ивановска, која како амбасадор на мирот е дел од Универзалната федерација за мир (Universal Peace Federation – UPF), соработник во овој проект.

Проф д-р Шеќеринка Ивановска

Проектот е поддржан од Европската Унија и е наменет за млади луѓе, студенти. Партиципираат по 7 учесници од 5 држави: Северна Македонија, Албанија, Италија, Велика Британија и Косово. Во групата од 7 студенти претставници на Р. Северна Македонија учествуваат тројца студенти од Факултетот за економија и организација на претприемништвото: Милена Паневска, Деан Вренцовски и Пеце Петровски.

Целта на проектот беше преку организирани предавања и работилници да се разменат искуства на младите луѓе, да се согледаат мултикултурните вредности карактеристични за секоја од овие држави, нивните култури, традиции, обичаи. Беа посетени значајни образовни институции – училишта, културни споменици во реонот на Мулет – Тирана, и учесниците имаа можност да се запознаат со традиционалните танцови, песни и слично.