Од 27 до 29 март 2025 година, на Институтот за национална и меѓународна безбедност во Белград, Србија, се одржа Безбедносниот форум под наслов: „Belgrade Security and Intelligence Forum“. Настанот претставуваше значајна меѓународна платформа за размена на мислења, анализи и искуства во областа на безбедноста, разузнавањето и глобалните безбедносни предизвици.

На форумот присуствуваа голем број експерти, научници и професионалци од областа на безбедноста. Учесниците беа од скандинавските, централноевропските и балканските држави, меѓу кои: Данска, Холандија, Италија, Полска, Словачка, Унгарија, Романија, Грција, Велика Британија, Украина, Словенија, Хрватска, Србија, Македонија и Црна Гора. Но, форумот имаше и поширока меѓународна димензија со претставници од САД, Израел и Нигерија, што придонесе за поголем глобален дискурс на теми поврзани со безбедносната политика и стратегија.

Како единствен претставник од Република Северна Македонија, на форумот свое излагање имаше ректорот на Меѓународниот Славјански Универзитет, проф. д-р Васко Стамевски. Тој се обрати на тема: „Улогата на специјалните единици во борбата против тероризмот“, при што ја истакна клучната важност на специјализираните безбедносни структури во справувањето со современите безбедносни закани. Неговото излагање со интерес беше проследено од присутните и иницираше подлабоки дискусии на панел-сесиите што следеа.

Во рамките на предвидената работна агенда, покрај останатото, ректорот Стамевски оствари билатерална средба со директорот на Институтот за национална и меѓународна безбедност, проф. д-р Дарко Трифуновиќ. На средбата беше потпишан договор за соработка меѓу двете институции, со кој се воспоставуваат основи за заеднички научни и академски активности.

Дополнително, се разговараше за идните заеднички проекти, организирање на конференции, обуки и стручни работилници, како и за интензивирање на академската мобилност преку програмата Еразмус+. Особено внимание беше посветено на можностите за унапредување на интернационализацијата на образованието, со посебен акцент на потребата од размена на знаење и искуства и поттикнување на регионалната соработка во доменот на безбедноста.

Форумот заврши со заеднички заклучоци и препораки за натамошно продлабочување на меѓународната соработка, справување со новите безбедносни предизвици и градење на покохезивни стратегии за заштита на националната и меѓународната безбедност.