Во рамки на Еразмус+ програмата претставници на Меѓународен Славјански Универзитет – Михаела Ѓорчева, Иван Спасев и Снежана Ѓорчева – реализираа успешна мобилност на Великотрновскиот универзитет „Св. Св. Кирил и Методиј“ во Велико Трново, Бугарија, во јули 2025 година.

Во текот на посетата, беа остварени значајни средби со ректорот на универзитетот, проф. д-р Димитар Димитров, како и со проректорката за меѓународна соработка, проф. д-р Ана Иванова. Разговорите беа насочени кон продлабочување на постојната долгорочна соработка помеѓу двете институции, како и разгледување на нови можности за мобилности преку Erasmus+ програмата.

Средбите беа насочени и кон анализа на досегашните резултати од заедничките активности и идентификација на нови насоки за проширување на академската соработка.

Великотрновскиот универзитет е долгогодишен партнер на Меѓународен Славјански Универзитет, со кој заеднички сме реализирале повеќе иницијативи, вклучувајќи мобилност на студенти, наставен и административен кадар, како и организирање на заеднички курсеви, кратки обуки и програми. Средбата во Велико Трново беше одлична можност за дополнително зајакнување на овие активности.

Двете институции изразија силна волја за продолжување и продлабочување на меѓусебната соработка преку развој на нови образовни програми кои ќе придонесат за збогатување на академското искуство и интернационалната видливост на студентите и кадарот.

Меѓународната соработка останува еден од стратешките приоритети на Меѓународен Славјански Универзитет, со цел постојано отворање нови можности за квалитетен развој и глобално вмрежување.