На 27 март 2023, во сојузната држава Утараканд во Индија Меѓународен Славјански Универзитет потпиша договор за соработка со Утаранчал Универзитетот кој е рангиран помеѓу првите 5% високообразовни институции во Индија. На кампусот кој се простира на повеќе од 400.000 m2, Утаранчал Универзитетот во моментов нуди повеќе од 100 студиски програми и има повеќе од 10.000 студенти.

Договорот беше потпишан од генералниот секретар на Утаранчал Универзитетот, д-р Ануџ Кумар Рана, и м-р Михаела Ѓорчева, член на Управен Одбор на Меѓународен Славјански Универзитет. На потпишувањето на договорот присуствуваше и Иван Спасев, член на Управен Одбор при МСУ, а од Утаранчал Универзитетот присуствуваа неговиот основач – д-р Џитендер Џоши, д-р Дарам Буди – ректор, д-р Раџеш Бахугуна – проректор, д-р Сатбир Сехгал – проректор и д-р Шраван Кумар – декан.

Во рамки на посетата беа остварени средби со деканите на повеќе факултети, професори и студенти, а беа посетени и повеќе лаборатории на универзитетот. На средбите беа дискутирани точките од договорот за соработка, како програми за размена на студенти и наставен кадар, заеднички истражувања и спроведување практична настава.