Меѓународен Славјански Универзитет и Киноверзум веќе трета година учествуваат на Forbes 30/50 самитот во Абу Даби, глобален настан што ги обединува највлијателните жени од светот на бизнисот, политиката, технологијата и активизмот.

Оваа престижна платформа која се организира по повод Меѓународниот ден на жената ја слави моќта на женското лидерство, создавајќи простор за вмрежување, инспирација и заеднички идеи меѓу генерациите.

Нашата претставничка, Михаела Ѓорчева, учествуваше на форумот за идеи за претприемништво, каде што дискутираше за предизвиците со кои се соочуваат младите претприемачи и начините на кои жените лидери можат да создадат одржливи бизниси. Исто така, Михаела беше дел и од ручекот за вмрежување организиран од американската компанија Cisco.

Програмата на Forbes 30/50 самитот беше исполнета со панел-дискусии, интерактивни сесии и ексклузивни настани, на кои учествуваа некои од највлијателните жени во светот.

Настанот започна во училиштето Cranleigh во Абу Даби, каде што учесниците беа ментори на младите девојки за нивните идни кариери и професионален развој. Ова беше можност за споделување на искуства со новите генерации на жени лидери.

Покрај формалниот дел, учесниците имаа можност да се поврзат и во неформално опкружување – пустинска забава со традиционални елементи, камили и музика, што овозможи вистинско искусување на арапската култура и дополнително зближување меѓу лидерите.

Помеѓу средбите кои беа остварени би ги издвоиле оние со авторката Алка Џоши и поранешната федерална директорка за информатика на САД,  Клер Марторана.

Официјалното отворање на самитот го водеа Мика Брезински, Хума Абедин и Меги Мекграт, а меѓу говорниците беа авторката Алка Џоши, актерката Шерил Ли Ралф и заменик директорката на Cisco, Мејси Ендрјуз.

Еден од највпечатливите моменти од самитот беше свечената ифтар вечера во Аврамската куќа, симбол на меѓурелигискиот дијалог, мирот и толеранцијата. Овој простор, кој ги обединува џамијата, црквата и синагогата, претставуваше совршена локација за одбележување на женското лидерство во духот на заедништво и почит.

Големиот финален настан беше гала вечерата во музејот Лувр по повод Меѓународниот ден на жената, каде што беа доделени награди на жени што оставиле значаен печат во своите области. Помеѓу наградените беше и Урсула фон дер Лајен, претседателката на Европската комисија.

Во овој ексклузивен амбиент, Михаела Ѓорчева го претстави еден од првите дизајни на својот бренд на костуми, демонстрирајќи како модата може да биде симбол на моќ и лидерство.

Forbes 30/50 Summit во Абу Даби беше непроценливо искуство, платформа за инспирација и можност за вмрежување со некои од најзначајните жени во светот. Размената на идеи, новите пријателства и перспективите за идни соработки го прават овој самит вистински пример за тоа како жените можат да создадат моќни промени во општеството.