Михаела Ѓорчева, Иван Спасев и д-р Наташа Нанева од Меѓународен Славјански Универзитет и Киноверзум учествуваа на еден од највлијателните светски собири за млади лидери – Forbes Under 30 Summit, кој се одржа од 28 септември до 2 октомври 2025 година во Колумбус, Охајо, САД.

Поканата за учество беше упатена директно од Forbes, благодарение на признанието на Михаела Ѓорчева како дел од глобалната листа Forbes 30 Under 30 за Европа во 2022 година. Самитот собра млади визионери, основачи, инвеститори и креативци од целиот свет, нудејќи уникатна можност за вмрежување, размена на искуства и учество во ексклузивни програми.

Организаторите се погрижија учесниците да го доживеат автентичниот дух на Охајо и градот Колумбус преку внимателно осмислена програма што вклучуваше културни активности, локална гастрономија, тематски екскурзии и интерактивни настани. Целокупното искуство значително ги надмина рамките на класичен деловен самит.

Програмата вклучуваше говори и панел-дискусии со истакнати светски личности, меѓу кои актерката Лили Рајнхарт, олимписката шампионка Суни Ли и милијардерката Луси Гуо. Врвот на настанот беше приватниот концерт на пејачот Алекс Ворен, чие музичко дело „Ordinary“ стана глобален хит.