По повод десеттото јубилејно издание, Меѓународниот филмски фестивал „Киненова“ организира специјална филмска ревија со хуманитарен карактер, која ќе се одржи од 30 март до 3 април 2025 во Киноверзум во Домот на култура „Билјана Беличанец“ во општина Кисела Вода.

Настанот е посветен на жртвите и семејствата погодени од трагичната несреќа што неодамна се случи во Кочани. Сите средства собрани од продажбата на влезници ќе бидат донирани како поддршка за семејствата на настраданите.

Меѓународен Славјански Универзитет со гордост ја поддржува оваа иницијатива и ги охрабрува сите да дадат свој придонес.

Ревијата е начин да изразиме солидарност, сочувство и општествена одговорност во еден тежок момент за целата држава. Програмата, која првично беше планирана како вовед во јубилејното издание на фестивалот во 2025 година е адаптирана со цел да придонесе кон ширење на надежта и да оддаде достојна почит.

Во рамки на ревијата ќе бидат прикажани внимателно селектирани филмови – добитници на награди од претходните изданија на фестивалот „Киненова“. Публиката ќе има можност да ги проследи следните наслови:

• „Мажите не плачат“ (Босна и Херцеговина, 2017, 98 мин.) – режија: Ален Дрљевиќ
• „Хотел Пула“ (Хрватска, 2023, 95 мин.) – режија: Андреј Коровљев
• „Кафуле“ (Иран, 2023, 93 мин.) – режија: Навид Михандуст
• „Зад стоговите сено“ (Грција, Германија, Северна Македонија, 2022, 119 мин.) – режија: Асимина Проедру
• „На сѐ доаѓа крај“ (Хрватска, Северна Македонија, Србија, Црна Гора, Босна и Херцеговина, Турција, Бугарија) – авторски филм со силна регионална копродукција

Киноверзум ве поканува да бидете дел од оваа значајна културна и хуманитарна иницијатива. Преку силата на филмот, заеднички да придонесеме кон поддршка, сеќавање и солидарност.