Преку Еразмус+ програмата повеќе вработени од Меѓународен Славјански Универзитет месецов го посетуваат Великотрновскиот универзитет „Св. св. Кирил и Методиј“ во Бугарија. Првата посета беше од м-р Михаела Ѓорчева, член на Управен одбор на Меѓународен Славјански Универзитет. За време на посетата беше остварена продуктивна средба со проректорката за меѓународна соработка, доц. д-р Ана Иванова.

Великотрновскиот универзитет „Св. св. Кирил и Методиј“ е наш долгогодишен партнер. Во текот на оваа значајна средба беа разгледани постигнатите резултати од веќе спроведените заеднички програми и иницијативи. Овие програми вклучуваат студентска и мобилност на наставен и административен кадар, заеднички курсеви и кратки програми за обука, како и размена на искуства и знаења помеѓу студентите и академскиот кадар.

Двете страни изразија задоволство од досегашната соработка и посветеност на натамошно унапредување на односите помеѓу двата универзитети. Особено внимание беше посветено на наоѓањето на нови можности за подобрување на соработката и развој на нови заеднички програми кои ќе го збогатат академското искуство на нашите студенти.

Меѓународната соработка претставува основен приоритет за нашиот универзитет и ние остануваме посветени на создавање нови можности за нашите студенти и академски кадар.