Од 27-ми октомври, до 3-ти ноември, беше реализирана 4-тата размена на студенти и професори помеѓу МСУ и Тамбовскиот универзитет од Русија. При размената  се работеше на повеќе проекти од областа на образованието, науката и културата, кои беа заеднички подготвени од македонските и руските студенти.

Во составот на македонската делегација беше генералниот директор на МСУ, Борче Серафимовски, нашиот ректор, Душко Николовски и деканот на Економскиот факултет при МСУ, Шеќеринка Ивановска. Програмата вклучуваше разни проекти од областа на економијата, психологијата, новинарството и спортот.

На 28-ми октомври, македонската делегација беше на прием кај ректорот на Тамбовскиот Универзитет, Владислав Михајлович, каде се продолжи договорот за соработка меѓу МСУ и универзитетот од Тамбов. Македонската делегација ја имаше можноста да се запознае со градот Тамбов, со руската култура, традиција и обичаи преку прошетки,  посети на познати музеи и разни културни програми. Исто така, нашите студенти ја имаа можноста да посетат една од повеќето Тамбовски локални телевизии, Новый век, која ја гледаат приближно 1,5 милиони жители. Освен што имаа можност да се запознаат со принципот на правење емисии во живо и емитување вести, им беше дадена и можноста да се стават во улогата на ТВ-презентери, во главното студио на телевизијата.

Таму нашата делегација го прослави и денот на менаџерите, 1-ви ноември, кога нашиот студент Дарко Илиевски одржа концерт пред руската публика. Следниот ден имаше организирана посета на куќата на Рахмањинов, во местото Ивановка, каде можеа да се видат автентични парчиња мебел што тој ги поседувал. Во склоп на размената на студенти беше организирана и посета на рускиот главен град, Москва, каде студентите се прошетаа по Црвениот плоштад, ги разгледаа Московскиот Кремљ, познатата црква Св.Василиј и Московскиот ГУМ, една од најпознатите стоковни куќи во Светот, која гледа кон Црвениот плоштад.

Погледнете ги фотографиите подолу:

[g-gallery gid=”948″ random=”0″ watermark=”0″]