Во силен академски контекст што ги обединува најистакнатите млади истражувачи од Европа и Азија, Михаела Ѓорчева, докторанд на Универзитетот во Љубљана и заменик претседател на управниот одбор на Меѓународен Славјански Универзитет, ги презентираше резултатите од своето истражување на престижната Конференција на бизнис школи на Кина и Европа и Симпозиумот за докторски студии на Сојузот на кинески и европски бизнис школи – ACE (Alliance of Chinese and European Business Schools).

Настанот се одржа на Универзитетот во Шјиамен, Кина од 09. до 12. декември 2025 година.

Со трудот под наслов „Анализа на однесувањето на потрошувачите преку нетнографија на дигитални платформи за социјална интеракција“, Ѓорчева ги отвора клучните прашања за трансформацијата на начините на анализа на потрошувачките навики во дигиталната ера – тема од особена важност за современиот маркетинг, бизнис стратегиите и примената на податоци во реално време. Истражувањето е иновативен придонес во развојот на нови методологии, засновани на нетнографија и анализа на однесување на дигиталните заедници.

Конференцијата што се одржа на Универзитетот во Шјиамен (Кина) обедини млади научници од водечки универзитети:

• Универзитетот во Љубљана (Словенија)
• Универзитетот во Антверпен (Белгија)
• Универзитетот во Лидс (Англија)
• Универзитетот во Шјиамен (Кина)

Во фокусот на настанот беа најновите академски истражувања поврзани со вештачката интелигенција, потрошувачките трендови, интеркултурната соработка, како и изградба на нови академски партнерства кои ќе го дефинираат идниот развој на бизнис образованието на глобално ниво.