На 13 декември 2025 година, во топлата и инспиративна атмосфера на Киноверзум Скопје, се реализира уште едно успешно издание од серијата „Денови на психологија“, организирано од Меѓународен Славјански Универзитет. Овој настан беше посветен на тема од големо значење за современото живеење – психолошки перспективи на љубовта, загубата и процесот на простување.

Настанот привлече големо внимание и беше посетен од бројни студенти, наставен кадар, како и експерти од областа на психологијата и сродни професии. Програмата започна со проекција на филмот „Без каење“, кој претставуваше вовед во понатамошната дебата за психолошките аспекти на љубовните односи, справувањето со загуби и значењето на простувањето, гледано низ призмата на личниот и меѓучовечкиот развој.

По филмската проекција, следеше панел-дискусија со реномирани стручњаци од полето:

• Весна Алексоска – професор и психолог
• Виолета Георгиевска – психолог и системски семеен психотерапевт
• Мирјана Јовановска Стојановска – професор и психодрама психотерапевт
• Диана Белевска – професор и лиценциран психолог
• Вера Димовска – гешталт терапевт и основач на „Анима – Центар за личен развој, едукација и психотерапија“
• Модератор: Слаѓана Анѓелкоска

Дискусијата го отвори прашањето за тоа како психолошките процеси се одразуваат врз љубовните релации, како луѓето се справуваат со емоционални загуби, и како процесот на простување може да влијае врз менталното здравје. Настанот создаде простор за продлабочена анализа и споделување на нови гледишта, релевантни и на индивидуално и на општествено ниво.

Серијата „Денови на психологија“ продолжува и се заокружува со финалниот настан во Свети Николе. Завршниот дел ќе се одржи на 20 декември 2025 година (сабота), со почеток во 11:00 часот, во Киноверзум Свети Николе. Настанот ќе понуди нови теми, релевантни предавачи и интерактивни активности, фокусирани на темата: „Меѓу емоциите и етиката: предизвици на работното место на психологот“.