Здружението на студенти при Меѓународен Славјански Универзитет (ЗС МСУ) објавува повик за учество на младинската размена „DigitA(I)GE – Beyond the Screen: Critical Thinking in the Digital Age“, која ќе се реализира во рамките на програмата Еразмус+ во Романија.

Проектот ќе ги обедини младите од Романија, Италија, Унгарија, Турција и Северна Македонија со цел да ги унапредат своите знаења и вештини во областа на дигиталната безбедност, медиумската писменост, критичкото размислување и одговорната употреба на вештачката интелигенција.

За проектот

„DigitA(I)GE“ има за цел да ги поттикне младите да станат посигурни и поодговорни дигитални граѓани преку:

• препознавање дезинформации и развивање навики за проверка на факти;
• зајакнување на дигиталната безбедност и одговорното онлајн однесување;
• подигнување на свеста за манипулирана и содржина генерирана со вештачка интелигенција;
• поттикнување на младинско учество, инклузија и интеркултурна соработка;
• споделување на стекнатите знаења во локалните заедници по завршувањето на размената.

Кој може да учествува?

Се бараат 6 млади учесници од Северна Македонија и 1 групен лидер, кои ќе ја претставуваат нашата држава на оваа меѓународна младинска размена.

Проектот е наменет за млади на возраст од 16 до 25 години, со посебен фокус на млади со помалку можности, вклучувајќи:

• млади од рурални средини;
• млади од социјално и економски ранливи категории;
• припадници на малцински заедници;
• млади со ограничен пристап до образовни можности.

Од учесниците се очекува активно учество во сите активности, работа во интернационални тимови и подготвеност за споделување на искуствата по завршувањето на проектот.

Кога и каде?

• Период на реализација: 20 – 29 јули 2026 година (вклучени денови за патување)
• Локација: Пансион „Colț de Rai“, Догнеча, округ Караш-Северин, Романија.

Што е обезбедено?

Проектот е целосно финансиран преку програмата Еразмус+. За избраните учесници се обезбедени:

• сместување;
• три оброци дневно и освежување за време на активностите;
• работилници и образовни активности;
• Youthpass сертификат;
• рефундација на патни трошоци согласно правилата на проектот.

Аплицирање

За пријавување, Ве молиме пополнете ја следнава апликација и ќе бидете контактирани од страна на нашиот тим. Аплицирањето трае до 08.07.2026.

За дополнителни прашања Ве молиме обратете се на info@zs.msu.edu.mk