На 26 април 2023 година (среда) на Меѓународен Славјански Универзитет во Свети Николе се одржа работилница на тема „Заштита на жртвите на родово базирано насилство во Р. С. Македонија“. Предавач на настанот беше Елена Димушевска, извршна директорка на Националната мрежа против насилство врз жени и семејно насилство заедно со доц. д-р Милена Спасовска, професор на Факултетот за психологија при МСУ.

Денешната работилница имаше за цел да ги поттикне присутните да ги препознаат и да им дадат поддршка на жртвите на родово базирано насилство во Р.С. Македонија. За адекватно справување со овој проблем, неопходно е да се едуцираат луѓето за природата и последиците од родовото насилство, како да го препознаат и како да им дадат поддршка на жртвите. Оваа работилница беше можност за учесниците да научат за важноста од слушање, верување и поддршка на жртвите и начините на кои тие можат да помогнат.

Клучниот акцент на работилницата беше ставен на важноста од препознавање и спречување на родово засновано насилство. Присутните научија за различните форми на насилство, вклучувајќи физичко, емоционално, сексуално и економско насилство, и како да ги препознаат знаците на насилство и да разговараат со луѓето што го доживуваат.