Две преполни сали и одличен почеток за „Тепихот на Биг Лебовски“! Со голем интерес од публиката и одлична атмосфера, Алтернативниот театар „Пробатон“, кој работи со поддршка на Институтот за култура и уметност при Меѓународен Славјански Универзитет, успешно ја започна својата нова театарска приказна – „Тепихот на Биг Лебовски“!

На 16 октомври претставата ја имаше својата премиера во Свети Николе, а веќе следниот ден, на 17 октомври, беше изведена и на сцената на Народниот театар во Штип. Двете изведби поминаа пред преполни сали, со многу смеа, аплаузи и позитивни реакции од публиката.

На премиерната вечер во Киноверзум на МСУ во Св. Николе присуствуваа и гости од културниот, академскиот и јавниот живот, меѓу кои Јордан Плевнеш, ректор на Универзитетот „Еуропа Прима“, театарскиот критичар и професор Гоце Ристовски, како и Стефан Лазаров и Фин Германецот.

Претставата е во режија на Ѓорѓи Ризески, според текст на Сашо Костовски, инспириран од култното филмско остварување на браќата Коен.

На сцената настапуваат Милорад Ангелов, Чедомир Митевски, Стефан Ѓорчев, Марко Трајковиќ, Марија Лазарова, Горан Илиќ, Леонтина Краљевска и Ведра Димова.

Особено сме горди што оваа продукција обединува актери од различни градови и генерации, кои со својата посветеност, талент и креативност создадоа претстава што уште со првите изведби го привлече вниманието на публиката.

За Меѓународниот Славјански Универзитет, поддршката на културата и уметничкото творештво е важен дел од нашата мисија. Преку работата на Институтот за култура и уметност и Алтернативниот театар „Пробатон“, продолжуваме да придонесуваме за развојот на независната театарска сцена и збогатувањето на културниот живот во Македонија.