На 22 април во Хотел Елса – Angels Скопје свечено беше одржана промоцијата на најновото научно дело на универзитетскиот професор д-р Живко Митревски, со наслов „Меѓународни трудово-правни и синдикални синтези и практики“.

Станува збор за значаен труд посветен на феноменологијата на трудот во услови на современи глобални предизвици, обликувани од четвртата индустриска револуција, дигитализацијата, промените на пазарот на труд, геостратешките поделби, миграциските движења, глобализацијата и неолибералните политики.

Во своето дело, авторот понуди аналитички синтези и компаративни согледувања, отворајќи суштински прашања за потребата од нов социјален договор, модернизација на синдикалното организирање, унапредување на работното законодавство, меѓународни стандарди за колективно преговарање, положбата на младите на пазарот на труд и иднината на работните односи.

Посебен акцент беше ставен и на темите поврзани со работничката партиципација, како и потребата од воспоставување специјализирани судови за работни спорови, како важен чекор кон поефикасна заштита на работничките права.

За значењето на трудот пред присутниот аудиториум говореа рецензентите проф. д-р Лазар Јовевски, проф. д-р Мевледин Мустафи и проф. д-р Орде Горгиески, кои ја истакнаа научната и практичната вредност на изданието.

Авторот упати благодарност до рецензентите, издавачот Меѓународен Славјански Универзитет, како и до претседателот на Управниот одбор проф. д-р Јордан Ѓорчев, за поддршката во реализацијата на ова значајно дело.

Со поддршка и промоција на вакви научни изданија, Меѓународен Славјански Универзитет уште еднаш ја потврди својата улога како академска институција што активно придонесува во развојот на научната мисла, општествениот дијалог и современите политики во областа на трудот и правото.