На 21 и 22 јули 2026 година, ректорот на Меѓународниот Славјански Универзитет, проф. д-р Васко Стамевски, престојуваше во Атина, Република Грција, на покана од Истражувачкиот институт за европски и американски студии (RIEAS).

Во рамките на посетата, на свечена церемонија, ректорот Стамевски на проф. д-р Џон Номикос му ја додели почесната титула Professor Honoris Causa, како признание за неговиот значаен придонес во развојот на високото образование, науката и меѓународната академска соработка.

За време на посетата беше потпишан и Меморандум за соработка со Димитрис Агуридис, директор на канадската компанија INTUS SmartCities, со цел воспоставување филијала на CUTI (Connected Utilities & Training in Infrastructure).

Оваа иницијатива претставува значаен чекор кон развој на заеднички истражувачки и иновативни проекти, особено во областите на урбаната мобилност, инфраструктурата и примената на современите технологии.

Новата соработка отвора можности за размена на знаења и експертиза, реализација на заеднички проекти и продлабочување на врските меѓу академскиот и бизнис-секторот на меѓународно ниво.

Со овие активности, Меѓународниот Славјански Универзитет уште еднаш ја потврдува својата посветеност кон интернационализацијата, јакнењето на меѓународните партнерства и создавањето нови можности за студентите, академскиот кадар и развојот на научно-истражувачката дејност.