Факултетот за психологија при Меѓународен Славјански Универзитет успешно го реализираше првиот ден од онлајн форумот „Квалитетно образование – психологијата во образованието во центарот на учењето и развојот“, кој се одржа на 30 октомври 2026 година преку платформата Zoom.

Настанот привлече голем интерес и обедини речиси 250 учесници, меѓу кои студенти, наставници, психолози, педагози, стручни соработници и други заинтересирани за современите предизвици во образованието.

Форумот го отвори деканката на Факултетот за психологија при Меѓународен Славјански Универзитет, проф. д-р Слаѓана Анѓелкоска, која го истакна значењето на психологијата во создавањето квалитетна, инклузивна и поддржувачка образовна средина, како и важноста на континуираното професионално усовршување и размената на знаења и искуства.

Во рамки на првиот ден беа одржани три стручни предавања посветени на доживотното учење, вниманието и мотивацијата како значајни фактори во образовниот процес.

Проф. д-р Ѓорѓина Ќимова говореше на тема „Потреба од доживотно учење и емоционална интелигенција – предуслов за квалитетна образовна средина“, истакнувајќи ја поврзаноста меѓу личниот развој, емоционалната интелигенција и создавањето позитивна средина за учење.

Проф. д-р Ана Чучкова го одржа предавањето „Психологија на вниманието: зошто не можеме да учиме кога умот е на друго место“, посветено на психолошките механизми на вниманието и нивното влијание врз концентрацијата, усвојувањето знаења и успешноста во учењето.

Проф. д-р Горица Поповска Налевска говореше на тема „Мотивација за учење и современи наставни пристапи – од пасивен ученик до активен учесник“, осврнувајќи се на значењето на мотивацијата и современите образовни методи кои го поттикнуваат активното учество на учениците во наставниот процес.

Предавањата отворија значајни прашања за улогата на психолошките фактори во образованието, истакнувајќи ја потребата од современи пристапи што ги препознаваат индивидуалните потреби на учениците и го поддржуваат нивниот целокупен развој.

Големиот интерес и бројното учество на првиот ден ја потврдуваат важноста на темите што ги обработува форумот. Настанот продолжува утре, 31 октомври, со нови стручни предавања посветени на улогата на психологијата во училиштето, инклузијата и соработката во образовниот процес.

Со реализацијата на овој форум, Меѓународен Славјански Универзитет продолжува да создава простор за академска дискусија, професионална размена и унапредување на образовните практики.