На 3 април 2023 година делегација од Меѓународен Славјански Универзитет го посети Универзитетот Махариши Маркандешвар во Мулана, Индија. МСУ и ММ – Мулана соработуваат од 2022 година и во рамки на посетата беше потпишан нов договор за соработка помеѓу двата универзитети. Основан во 1993 година, Универзитетот Махариши Маркандешвар е приватен универзитет кој е рангиран помеѓу најдобрите 100 универзитети во Индија.

М-р Михаела Ѓорчева и Иван Спасев, членови на Управен одбор при Меѓународен Славјански Универзитет имаа средба со ректорот д-р Хариш Кумар Шарма и вработените од Канцеларијата за меѓународни односи при Универзитетот Махариши Маркандешвар. На средбата се разговараше и за продлабочување на соработката помеѓу двата универзитети на повеќе полиња, со посебен фокус на студентските размени како и можностите за студентска пракса.

Медицинскиот факултет кој нуди повеќе програми за додипломски и постдипломски студии е најголемиот факултет при Универзитетот Махариши Маркандешвар. Кампусот на универзитетот вклучува болница каде студентите можат да се вработуваат, лаборатории, спортски комплекс со седум спортски сали, базени, трговски центри, банки, пошта и повеќе ресторани.