Во пријатната летна атмосфера покрај Преспанското Езеро, во Mayberry Lake во Претор, овој викенд се одржа Летната школа по психологија на Меѓународен Славјански Универзитет. Тридневната програма, насловена „Од Јас до Ние – самоспознавање, граници и емоционална свесност за градење здрави односи“, ги собра студентите околу практични теми важни и за нивниот личен и за професионалниот развој.

Наместо класични предавања, програмата беше организирана преку интерактивни работилници, дискусии и групни активности посветени на самоспознавањето, личните граници, емоциите, односите со другите и грижата за себе. Со студентите работеа професори и предавачи од Факултетот за психологија при МСУ, а дел од активностите вклучуваа и современи практични и креативни психолошки техники.

Проф. д-р Слаѓана Анѓелкоска, декан на Факултетот за психологија при МСУ, вели дека овогодишната школа поминала во одлична атмосфера. „Студентите оставија извонреден впечаток со нивната љубопитност, интелектуална зрелост и подготвеност за работа. Програмата беше целосно интерактивна и динамична, а наместо класични предавања, работевме низ практични работилници.“

Според неа, една од најголемите вредности на ваквите активности е можноста студентите да го применат во пракса она што го изучуваат во текот на студиите. Покрај нови знаења, учесниците од Претор си заминаа и со практични алатки за емоционална свесност, подобро разбирање на сопствените граници и нови пријателства со колеги.

„Научија како во реалниот живот да ги препознаваат сопствените граници, како да ги разберат другите и како да соработуваат како тим. Додека факултетот ја дава теоретската база, Летната школа овозможува непосредна примена на знаењето низ искуствено учење“, објаснува Анѓелкоска.

Таа нагласува дека токму ваквите искуства се особено важни за идните психолози, кај кои, покрај стручните знаења, треба да се развиваат емпатијата, способноста за слушање и разбирањето на односите меѓу луѓето.

За младите кои размислуваат за својата идна професија, Анѓелкоска смета дека психологијата станува сè поважна професија. „Потребата од поддршка за менталното здравје во општеството постојано расте, а нашиот Факултет за психологија нуди баланс помеѓу теоријата и практиката.“

Таа додава дека преку проекти како Летната школа, работа со посветени ментори и практични активности, целта е студентите да не стекнат само диплома, туку да се подготват како професионалци кои ќе можат да направат реална промена во заедницата.

Летната школа заврши со нови знаења, искуства и пријателства, но и со пораката што ја носеше самата тема на програмата – дека градењето здрави односи со другите започнува со подобро разбирање на себеси.