Денеска Меѓународен Славјански Универзитет и НУ – Универзитетска библиотека „Гоце Делчев“ од Штип официјално потпишаа Договор за соработка, со кој се воспоставува партнерство насочено кон унапредување на образованието, професионалниот развој и реализацијата на заеднички активности.

Договорот го потпишаа претседателот на Управниот одбор на Меѓународен Славјански Универзитет, проф. д-р Јордан Ѓорчев, и претседателот на НУ – УБ „Гоце Делчев“, Ивана Биџовска.

Со оваа соработка, вработените на библиотеката добиваат можност да ги користат поволностите што ги нуди Меѓународен Славјански Универзитет за студирање на сите факултети и студиски циклуси, преку специјални корпоративни пакети и поволности, со цел високото образование да биде подостапно за поширок круг граѓани.

Партнерството предвидува и организирање на заеднички обуки, семинари, конференции, работилници, предавања и други едукативни и научни активности, кои ќе придонесат за размена на знаења, развој на нови иницијативи и јакнење на соработката меѓу двете институции.