На ден 3 јули 2025, во просториите на Меѓународен Славјански Универзитет, беше официјализирана нова соработка со потпишување на меморандум помеѓу Универзитетот и Здружението за целосен развој и еманципација на турците од источниот дел на СРМ – ЕМ, Штип. Од името на Меѓународен Славјански Универзитет, договорот го потпиша проф. д-р Јордан Ѓорчев, претседател на Управниот Одбор, додека Здружението го претставуваше неговиот претседател, м-р Сејат Али.

Овој чекор претставува значаен напредок во унапредувањето на интеркултурната соработка, со што Универзитетот отвора нови можности за млади луѓе од турската заедница во источниот дел на земјата. Во рамки на договорот, Меѓународен Славјански Универзитет ќе им овозможи пристап до современи студиски програми на заинтересираните кандидати од здружението, а особено важно е што ќе бидат доделени две стипендии за двајца студенти кои ќе бидат избрани преку здружението. Со оваа соработка се продлабочува заложбата на Универзитетот за креирање инклузивна академска средина и поддршка на младите од различни заедници, со цел изградба на општество базирано на знаење, почит и соработка.

На настанот присуствуваше и нашата Еразмус+ студентка од Турција, Ајсима Џејлан, која во моментот е на пракса на Меѓународен Славјански Универзитет. Нејзиното присуство придонесе за дополнително збогатување на средбата со лична и интернационална перспектива на значењето од ваквите соработки.

Меѓународен Славјански Универзитет продолжува активно да гради мрежа на партнерства кои ги надминуваат границите и отвораат нови хоризонти за иднината на студентите.