На 7 октомври 2024 година, Меѓународен Славјански Универзитет во Свети Николе имаше чест да биде домаќин на свечена академија по повод одбележувањето на Националниот празник на Народна Република Кина и 30-годишнината од основањето на Друштвото за македонско-кинеското пријателство и соработка Скопје-Свети Николе.

На настанот се обрати вршителот на должност амбасадор на Народна Република Кина во Република Северна Македонија, Шју Леи. Настанот започна со официјални обраќања, помеѓу кои и на претседателот на Управен одбор на МСУ, проф. д-р Јордан Ѓорчев, градоначалникот на Општина Свети Николе, г. Дејан Владев, и претседателот на Друштвото за македонско-кинеското пријателство и соработка, г. Љупчо Маленков.

По официјалниот дел, следеше богата културна програма. Деканот на Филолошкиот факултет при УКИМ, проф. д-р Владимир Мартиновски, ја претстави својата поезија на македонски и кинески јазик, во придружба на Мила Динковска (член на МКДПС и изучувач на кинески јазик при институтот „Конфучие“ и Теа Димкова (од Дом на култура „Крсте Петков Мисирков“ – Свети Николе), кои учествуваа со читање на поезија.

Мандолинскиот оркестар „Свети Николај“ од Свети Николе ги воодушеви присутните со својот настап, а особен впечаток оставија настапите на солистката Марија Атанасова и пијанистот Илче Костадинов. Прекрасните музички изведби ја комплетираа вечерта, придонесувајќи за свечената атмосфера. Вечерта заврши со коктел и неформално дружење.

Овој настан уште еднаш го потврди силното пријателство и културната соработка меѓу народите на двете земји.