Меѓународен Славјански Универзитет, втора година по ред, учествуваше на Меѓународниот саем за образование „2nd International Education Fair 2026“, кој се одржа на 7 и 8 октомври на Универзитетот Чандигар во Индија.

Саемот беше можност за претставување на студиските програми на МСУ пред повеќе од 10.000 потенцијални студенти, како и за непосредни разговори со младите заинтересирани за продолжување на своето образование во Северна Македонија. Особено голем интерес беше забележан за студиските програми од областа на психологијата и информатиката.

Универзитетот го претставуваа Иван Спасев, член на Управниот одбор, Михаела Ѓорчева, заменик-претседател на Управниот одбор, проф. д-р Марија Гроздановска, проректор за меѓународна соработка и развој, и доц. д-р Мартин Ѓорѓиев, генерален секретар. Михаела Ѓорчева учествуваше и на свечената церемонија на отворањето на саемот.

Учеството на настанот е дел од подолгорочните активности на МСУ за привлекување студенти од Индија. Големиот интерес за понудените студиски програми претставува дополнителен поттик за развој на оваа иницијатива и за јакнење на меѓународната видливост на Универзитетот.

Меѓународен Славјански Универзитет продолжува да ги развива своите меѓународни партнерства и да ги претставува можностите за студирање пред идните студенти од различни земји.