Судницата е училница за идните правници!

Проректорката за меѓународна соработка и развој, проф. д-р Марија Гроздановска, и деканот на Факултетот за правни науки, проф. д-р Иван Ефремовски, заедно со група студенти од Меѓународен Славјански Универзитет, денес остварија посета на Основниот суд во Битола.

Посетата се реализираше во рамки на Меморандумот за соработка помеѓу Универзитетот и Основниот суд во Битола, со цел студентите да добијат можност непосредно да се запознаат со функционирањето на судскиот систем и практичната примена на правото. Преку ваквите активности, студентите ги надградуваат своите теоретски знаења, стекнуваат практични искуства и развиваат подобро разбирање за улогата и одговорностите на правните професионалци.

Практичната настава претставува важен дел од образовниот процес на Меѓународен Славјански Универзитет. Ваквите посети им овозможуваат на идните правници да ја поврзат теоријата со реалните ситуации од судската практика, да се запознаат со професионалната средина и подобро да се подготват за предизвиците што ги очекуваат во нивната идна кариера.

Изразуваме искрена благодарност до претседателката на Основниот суд во Битола, Татјана Петровска и до судскиот администратор Силвана Дејановска за срдечниот прием, поддршката и придонесот во реализацијата на практичната настава за нашите студенти.

 Продолжуваме да создаваме можности за учење преку практично искуство, затоа што најдоброто образование е она што ги поврзува знаењето и практиката!