Во Mayberry Highway, дел од кампусот на Меѓународен Славјански Универзитет во Св. Николе, беше отворена самостојна изложба на Ивона Велковска. Изложбата „Осветлување, освестување, откривање, ослободување…“ беше отворена во рамки на свеченото врачување на дипломи на студентите од МСУ во Св. Николе.

Изложбата ја отвори основачот на Меѓународен Славјански Универзитет, проф. д-р Јордан Ѓорчев, а настанот беше модериран од м-р Митра Мими Спасова, магистер по филолошки науки и Драгица Солунчева, професорка по филозофија.

Ивона Велковска дипломира на Универзитетот „Св. Кирил и Методиј“ на Факултетот за ликовни уметности во Скопје, во 1999 година, во класата на проф. Рубенс Корубин. Како ликовен педагог и професорка во средното образование, таа учествува во бројни државни и меѓународни проекти, изложби и манифестации во Република Северна Македонија и странство. Нејзините дела се дел од бројни домашни и странски каталози и приватни колекции.

Досега Ивона Велковска има реализирано пет самостојни изложби. Од 2008 година, таа е активен член на Друштвото на ликовни уметници на Македонија (ДЛУМ), а во 2015 година е добитник на наградата за минијатура од НЛБ на „МиниАртура“. Таа е учесник на повеќе од 80 групни изложби во Република Северна Македонија и во странство.