Претставници на Меѓународен Славјански Универзитет денес присуствуваа на работен ручек со амбасадорката на Народна Република Кина во Република Северна Македонија, Н.Е. Џијанг Сјаојан, на кој се разговараше за академска и деловна соработка, современи технологии и можностите за нивна практична примена во процесот на едукација.

На средбата присуствуваа проф. д-р Јордан Ѓорчев, претседател на Управниот одбор на Меѓународен Славјански Универзитет, Михаела Ѓорчева, заменик претседател на Управниот одбор, Иван Спасев, член на Управниот одбор, како и Дејан Гавриловски, генерален директор на OneDrone Македонија, официјален дистрибутер на DJI дронови и дополнителна опрема поврзана со дроновите.

Посебен акцент во разговорите беше ставен на соработката меѓу Меѓународен Славјански Универзитет и OneDrone Македонија, во чии рамки заеднички се организираат професионални обуки за пилотирање со дронови. Разговорите беа насочени кон развојот на едукацијата и практичната примена на дрон-технологијата, како и кон создавање стручен кадар за нејзина одговорна употреба во области како геодезија и мапирање, земјоделство, инфраструктура, јавна безбедност, заштита и спасување, безбедност од пожар и индустриски инспекции.

Средбата беше и можност да се разговара за понатамошна академска соработка со високообразовни институции од Народна Република Кина, по посетата на претставници на Меѓународен Славјански Универзитет на Универзитетот Шјиамен (Xiamen University).

Целта е создавање услови за заеднички истражувања преку користење на дрон-технологијата и дополнително поврзување на академското знаење со современите технолошки решенија и нивната практична примена.