Денес Меѓународниот Славјански Универзитет беше домаќин на значајни гости кои активно придонесуваат во развојот на системите за заштита, спасување и волонтерство на меѓународно ниво. Во посета на Универзитетот, беа Фадиме Озбеј, раководител на Одделот за образование во Дирекцијата за управување со катастрофи и вонредни состојби во Анталија, Република Турција, Аки Мехмедов Кисјов, претставник на Националната асоцијација на доброволците во Република Бугарија, како и Дејан Спасевски, советник во Секторот за оперативна логистика при Дирекцијата за заштита и спасување на Република Северна Македонија. Посетата се реализира во рамки на проектот СТРО-ВОЛ – Зајакнување на волонтерскиот систем и капацитети.

Со поздравни обраќања на гостите им се обратија претседателот на Управниот одбор на Меѓународниот Славјански Универзитет, проф. Јордан Ѓорчев, како и ректорот на Универзитетот, проф. Васко Стамевски. Оваа соработка е особено значајна бидејќи е тесно поврзана со активностите на Факултетот за технички науки и информатика, особено со студиските насоки Безбедност при работа и Безбедност од пожар, кои се насочени кон развој на професионални кадри во областа на заштитата, превенцијата и управувањето со ризици.

Средбата претставува важен чекор кон продлабочување на меѓународната соработка, а во наредниот период се очекуваат бројни заеднички активности, проекти и иницијативи кои ќе придонесат за унапредување на знаењето, практичните вештини и институционалните капацитети во областа на безбедноста и управувањето со кризни ситуации.