Меѓународен Славјански Универзитет официјално потпиша Меморандум за соработка со Министерството за правда. Меморандумот беше потпишан од министерот за правда, Игор Филков и ректорката на Меѓународен Славјански Универзитет, проф. д-р Ленче Петреска.

На потпишувањето на меморандумот беше присутен и заменик претседателот на Управен Одбор при Меѓународен Славјански Универзитет, Борче Серафимовски.

Потпишувањето на меморандумот го означува првиот чекор на една значајна соработка која има за цел унапредување на соработката помеѓу двете институции и ја изразува заедничката посветеност на Министерството за правда и Меѓународен Славјански Универзитет за создавање квалитетно образование и правна практика која е во чекор со современите стандарди.

Соработката ќе овозможи размена на искуства и создавање на нови можности за студентите на универзитетот, кои ќе учествуваат во практични активности насочени кон зголемување на нивната стручност и применливото знаење.

Покрај придобивките за студентите, ова партнерство отвора можности и за наставниот кадар од Меѓународен Славјански Универзитет, со што во иднина би можеле да бидат вклучени во спроведување анализи и истражувања кои ќе придонесат за модернизација и усогласување на правниот систем со европските и меѓународните стандарди.