На 20 мај 2023 година во просториите на Меѓународен Славјански Универзитет започнаа да се реализираат активностите од Еразмус+ проектот „За да бидам вистински дел од тебе, дај ми и ти дел од себе општество мое“. Носител на проектот е Институтот за култура и уметност при МСУ, а активностите во оваа фаза на проектот ќе траат три дена.

Oва е единствена можност за нас да бидеме дел од нешто посебно и да се поврземе со луѓе од други европски земји. Денеска присуствуваат вкупно 10 учесници од Романија и 10 учесници од Република Северна Македонија. Неверојатна сцена – различни култури, јазици и насмевки се испреплетени во нашиот универзитетски кампус. Атмосферата е исполнета со возбуда и желба за запознавање нови луѓе.

Водител на настанот е Марија Саздева, а имаме предавач и на романски јазик, Габриела Александра Брајден. На отворањето, проф. д-р Соња Ризоска Јовановска, директорка на Институтот за култура при МСУ ја истакна важноста на овој проект и изрази благодарност до сите кои учествуваат во неговата реализација. Таа го сподели своето искуство од програмата Еразмус+ и ги охрабри учесниците да ја искористат секоја можност што ќе се создаде во текот на овој проект.

Во текот на овие три дена ќе бидеме дел од заедница каде што ќе се испреплетуваат различни култури и знаења, создавајќи незаборавни моменти и пријателства кои ќе траат.