Менталното здравје во текот на студирањето

 од Студентски блог – студентски размислувања

Пишува: Викторија Стојовска, студент на факултетот за Психологија

Студентските години често се опишуваат како еден од најдобрите периоди во животот. Студентскиот живот е период исполнет со нови искуства, можности, пријателства и личен развој. Но, истовремено, студирањето може да биде период на голем стрес, притисок и неизвесност. Испитите, семинарските трудови, роковите, финансиските предизвици и очекувањата од себе и од другите можат значително да влијаат врз менталното здравје на студентите.

Често од студентите се очекува постојано да бидат продуктивни, успешни и мотивирани. Но, реалноста е дека никој не може постојано да биде на максимум. Заморот, несигурноста, стравот од неуспех и чувството дека не сме доволно добри се емоции со кои многу студенти се соочуваат, иако можеби не зборуваат отворено за нив.

Особено во периодите на испитни сесии, стресот може да стане поинтензивен. Недостатокот на сон, учењето во последен момент и постојаното размислување за обврските можат да доведат до психичка и физичка исцрпеност. Затоа е важно студентите да разберат дека одморот не е губење време, туку неопходен дел од процесот на учење и зачувување на менталната енергија.

Грижата за менталното здравје во текот на студирањето започнува со препознавање на сопствените потреби. Добрата организација на времето, доволно сон, физичка активност, дружењето и кратките паузи можат да направат голема разлика. Исто така, важно е да не се споредуваме постојано со другите студенти. Секој има различно темпо, различни способности и различни животни околности. Универзитетот не треба да биде само место каде што стекнуваме знаење и академски титули. Тој треба да биде и средина во која младите луѓе ќе се чувствуваат безбедно, прифатено и поддржано.

Успехот на факултет не се мери само преку оценките. Вистинскиот успех е и да научиме како да се справуваме со предизвиците, како да поставуваме граници, како да се грижиме за себе и како да продолжиме напред и тогаш кога не е лесно.

Затоа, додека се бориме за подобри резултати, повисоки оценки и успешна иднина, не смееме да заборавиме на најважното да се грижиме за себе.
Јас, како веќе дипломиран психолог, би сакала со идните студенти, без разлика дали студираат на Факултетот за психологија или на некој од останатите факултети, да споделам неколку начини и искуства кои мене ми помогнаа да го зачувам балансот во животот за време на студирањето.

1. Поставување граници помеѓу „Студент“ и „Јас“

Вашиот индекс не е ваша вредност. Вие сте човечко суштество кое студира, а не студијата која живее. Секогаш пронајдете време за хобија кои немаат никаква врска со вашата струка на пример, пишувањето, уметноста, или било која креативна страст која ви дава слобода да бидете тоа што сте надвор од амфитеатрите и учебниците. Дајте му простор на она што ве храни одвнатре, бидејќи само така инспирацијата се враќа и во она што го учите.

2. Нормализирање на неуспехот

Паднатиот испит не е крај на светот, туку само фидбек дека методот на учење треба да се смени. Перфекционизмот е еден од моите најголеми непријатели на менталното здравје.

3. Грижа на физичка основа

Квалитетниот сон, редовната физичка активност и урамнотежената исхрана имаат директно влијание врз производството на невротрансмитери (како серотонин и допамин) кои го регулираат расположението. Секогаш трудете се да му го дадете на телото она што му треба за да го издржи менталниот напор.

4. Не заборавајте да живеете и надвор од факултетот

Студирањето е важен дел од вашиот живот, но не е целиот ваш живот.
Излезете со пријателите, разговарајте, смејте се, читајте книга која нема никаква врска со испитот што ве очекува, занимавајте се со нешто што го сакате. Создавајте спомени.
Еден ден, кога ќе погледнете наназад, нема да ги паметите само оценките и положените испити. Ќе ги паметите луѓето, разговорите, моментите на среќа, предизвиците кои сте ги надминале и личноста во која сте се претвориле.

5. Побарајте помош кога ви е потребна

Не мора секогаш сами да се справувате со се. Разговорот со пријател, член на семејството, професор или психолог не е знак на слабост. Напротив, препознавањето дека ни е потребна поддршка е знак на зрелост и грижа за себе.
Менталното здравје не треба да биде тема за која зборуваме само кога ќе се појави сериозен проблем. За него треба да се грижиме секојдневно.

За крај…

Студентскиот период не треба да биде трка во која мораме да стигнеме пред сите останати. Секој има свое темпо, свој пат и свои предизвици.
Затоа, учете. Напредувајте. Сонувајте. Поставувајте цели. Но, во целиот тој процес не заборавајте на себе.
Да, дипломата е важна. Но, менталното здравје е темелот врз кој ја градиме иднината.

Рубриката студентски блог е иницијатива на Здружението на студенти на Меѓународен Славјански Универзитет. Сите студенти при МСУ кои сакаат своето мислење да го изразат преку кратки есеи, можат својот пишан збор да го испратат на blog@msu.edu.mk.

*Сите испратени дела ќе бидат прегледувани од наш стручен кадар. Прифатените дела ќе бидат објавени на нашата официјална страна.