Меѓународен Славјански Универзитет и KARIERA.mk потпишаа Меморандум за соработка, со кој се отвораат нови можности за поврзување на студентите со компаниите и пазарот на трудот.

Меморандумот го потпишаа проф. д-р Јордан Ѓорчев, претседател на Управниот одбор на Меѓународен Славјански Универзитет, и Ружица Доневска, генерален директор на KARIERA.mk. На потпишувањето присуствуваше и доц. д-р Мартин Ѓорѓиев, генерален секретар на Универзитетот и раководител на Центарот за кариера.Новото партнерство е насочено кон создавање конкретни можности за вработување, практикантство и професионален развој на студентите, како и кон нивно поврзување со компании. Една од главните цели на соработката е да им се овозможи полесен премин од високото образование кон пазарот на трудот.

Во рамки на партнерството се предвидува организирање кариерни денови и саеми за вработување, работилници и презентации, како и активности за подготовка на студентите за интервјуа и процеси на селекција. Студентите ќе добијат и поддршка при креирањето професионален профил и биографија, со што ќе можат подобро да се подготват за идните професионални предизвици. За апсолвентите на Меѓународен Славјански Универзитет е предвидена и бесплатна активација на картичката „МојаКАРИЕРА ПРО“, која нуди бенефиции поврзани со развојот на кариерата.

Со ова партнерство, Меѓународен Славјански Универзитет продолжува да ја зајакнува врската меѓу образованието и реалните потреби на пазарот на трудот, создавајќи повеќе можности студентите уште во текот на студирањето да го градат својот професионален пат.