Киноверзум, универзитетското кино на Меѓународен Славјански Универзитет годинава беше партнер на 9. издание на Меѓународниот филмски фестивал Киненова, кој се одржа од 15. до 20. октомври во Скопје. Повеќето настани, како и врачувањето на наградите од фестивалот, се одржаа во нашето кино Киноверзум во Кисела Вода, со што деновиве Киноверзум беше центар на филмската уметност и култура.

За време на Киненова осебна чест и привилегија ни беше присуството на Претседателката на Република Северна Македонија, Гордана Силјановска Давкова на настанот посветен на финскиот филм заедно со амбасадорот на Финска, Н.Е. Никлас Линдквист, како и на проекцијата на филмот „Жена-убиец“ од грчката режисерка Ева Натена. Помеѓу присутните гости беше и градоначалникот на Општина Кисела Вода, Орце Ѓорѓиевски. Општина Кисела Вода е еден од поддржувачите на настанот.

На настанот од Меѓународен Славјански Универзитет присуствуваа ректорката, проф. д-р Ленче Петреска, проректорката за настава, проф. д-р Павлина Стојанова, Иван Спасев, член на Управен Одбор и Михаела Ѓорчева, член на Управен Одбор и основач на Киноверзум.

Фестивалот беше отворен на 15. октомври во киното Фросина, каде што австрискиот режисер Улрих Зајдл ја прими престижната награда „Златна грива“ за неговиот исклучителен придонес во филмската уметност. Со проекцијата на филмот „На сè доаѓа крај“ од хрватскиот режисер Рајко Грлиќ, на 20. октомври го затворивме ова успешно предјубилејно издание на Киненова. На проекцијата присуствуваше и актерот Јанко Поповиќ Волариќ.

Годинава фестивалот носи инспиративна тема – „Што е прво: Филмот или приказната?“ – отворајќи простор за истражување на врската помеѓу раскажувањето и визуелната уметност. Нашето партнерство со Киненова, заедно со поддршката од сите инволвирани институции, уште еднаш ги потврди напорите кои Киноверзум ги вложува да биде културна точка за промоција на врвната филмска уметност.

Горди сме на улогата што ја имавме во овој престижен фестивал и се радуваме на идни успешни соработки, со планови следната година фестивалот да се одржи паралелно и во останатите три кина на Киноверзум – Свети Николе, Велес и Штип.