Почитувани студенти, колеги и соработници на МСУ,

Додека стоиме на прагот на новата 2024 година, овие моменти ме потсетуваат на силните зборови на Анатол Франс: „За да постигнеме големи работи, мораме не само да дејствуваме, но и да сонуваме и не само да планираме, но и да веруваме“. Во овие зборови целосно е преточен духот на нашиот универзитет кој во годината што доаѓа ќе го прослави 20-годишниот јубилеј од основањето.

Кога нашиот универзитет беше основан во 2004 година во Свети Николе, тоа беше повеќе од само создавање на високообразовна установа – тоа беше остварување на еден сон. Сон кој веруваше во трансформативната моќ на образованието, сон кој беше внимателно реализиран со одлучност и надеж. Низ годините, овој сон продолжи да се развива и да расте, претворајќи ги нашите визии во реалност, проширувајќи ги нашите активности и посветеност надвор од нашите почетни граници.

Нашиот пат од овие скромни почетоци до прераснување во една од најголемите високообразовни институции во земјава ги одразува зборовите на Анатол Франс. Ние сонувавме за создавање на слободна и инспиративна академска заедница, верувавме во нашата мисија и дејствувавме според нашите уверувања и планови. Среќни сме што можеме да кажеме дека нашиот универзитет прерасна во крстосница каде се обединуваат и споделуваат знаењата од сите краеви во светот. Овој пристап не само што ни помогна да го развиеме универзитетот, но донесе и бројни домашни и интернационални признанија за нашиот придонес во образованието, културата, литературата и нашата посветеност кон заедницата во која работиме.

Додека се подготвуваме за празниците и со нетрпение ја очекуваме 2024 година, да се потсетиме на сонот и на вербата кои нè водеа две децении. Да продолжиме да сонуваме, да работиме, да планираме и целосно да веруваме во потенцијалот на нашиот универзитет и неговите вработени и студенти.

Оваа Нова Година наздравуваме за нашите минати достигнувања, за проектите кои во моментов ги реализираме и за уште подобра иднина за сите. Среќна Нова Година и нека нашето патување во следната година биде инспиративно како и патот кој досега сме го поминале!

Среќни празници!

проф. д-р Јордан Ѓорчев
основач на Меѓународен Славјански Универзитет