Нашата студентка од Факултетот за Психологија, Данче Митева, во моментов е на студии во Трнава, Словачка, преку програмата Еразмус+.

Во продолжение можете да прочитате за нејзините импресии и искуството од студирањето таму.

Најпрво би сакала да се заблагодарам на мојот универзитет Меѓународен Славјански Универжитет „Г. Р. Державин“ за можноста да се оди на една програма како што е Еразмус +, на нашата Еразмус координаторка Јасмина Пресилска која даде сè од себе за да може да се реализира оваа желба, а продолжува да ме подржува за што и да е потребно, како и овдешната Еразмус координаторка Ленка Словак која секогаш нé пречекува со насмевка и е спремна за наоѓање на какво и да е потребно решение.

Универзитетот на кој сум јас се вика Универзитет „Св. Кирил и Методиј”, се наоѓа во Трнава, Словачка, и има прекрасна катедра по психологија. Морам да ја искажам мојата благодарност и кон професорката Зузана Ројкова, координатор на катедрата по психологија, за сета подршка (и трпение), кај која одам често со прашања, желби и барања, како и професорката Андреа Барановска која издвојува време за навистина квалитетни консултации секоја недела и покрај многуте редовни студенти, а морам да го споменам и професорот Рудолф Фабри. Пoкрај предметите кои ги одбрав за овој семестар, поради моја љубопитност, без проблем ми беше овозможено да одам на консултации кај било кој професор за било кој предмет и тие со задоволство ми објаснија или покажаа нешто од својата сфера на работа. Ми беше големо задоволство да ги слушам и предавањата на професорите во посета.

Но, покрај тоа што учењето е на прво место, не значи дека е единствено. Една голема придобивка од Еразмус програмата е стекнување пријатели од голем број на држави, со кои знам дека контактот ќе продолжи и по завршувањето на овој семестар. На спратот од студентскиот дом во кој живееме владее хармонија покрај мешавината на националности, религии, култури, и вредности (доколку го занемариме коментарот на фрижидерот за открадената пица). Фразата “Благодарен сум на Еразмус затоа што ме изложи на луѓе со различни погледи.” често се повторува, а подобрувањето на англискиот јазик е очигледно кај сите.

Покрај сите бенефити, преселувањето во друга земја е тешко. Затоа сум крајно благодарна за постоење на ESN (Erasmus student network), кои дури организираа предавање за сите Еразмус студенти за како да го “преживееме” овој период водено од професор по психологија на Трнавскиот Универзитет. Подршка на Еразмус навистина доаѓа од многу страни и за многу сфери. Карла, Ребека, Марек и другите членови во оваа организација се сериозно посветени да им ја олеснат оваа транзиција на Еразмус студентите. Од подршка за технички проблеми надвор од факултетот, па се до организирање на разновидни настани за дружење и забава. Некои од овие настани беа: посета на градови; пештера; одење на фестивали; лизгање на лед; културни ноќи со јадења, песни, танцови, квизови; спортски игри..

Се разбира има време и за сопствено организирано патување. Поради местоположбата на градот секој викенд има по некој што отишол во Братислава, Виена, Будимпешта, Прага, Краков.. Додека поавантуристите стигнаа и до Италија, Франција, Норвешка, Холандија, Германија..

Еразмус + е предобра можност од многу аспекти (сопствен раст и развој, проширување на знаењето, пријатели, конекции..), но, како и се’ друго во животот, дали, како и колку ќе биде искористена зависи од самиот студент.