Студенти од Меѓународен Славјански Универзитет учествуваа на еднодневниот едукативен семинар „Собранието однатре: Дом на парламентарното право“, организиран од Парламентарниот институт при Собранието. На настанот присуствуваа и проф. д-р Јагода Митревска, проф. д-р Живко Митревски и м-р Маре Стоилова.

Семинарот обедини 50 студенти од Меѓународен Славјански Универзитет и Универзитетот „Гоце Делчев“ – Штип. Преку обиколка на Собранието, презентации и интерактивни дискусии, учесниците непосредно се запознаа со организацијата и функционирањето на законодавниот дом, правната положба на пратениците, историјата на парламентаризмот, основните функции на Собранието и постапката за донесување закони.

Посебен дел од програмата беше дискусијата со пратеникот Љупчо Пренџов, посветена на претставничката улога на Собранието. Студентите имаа можност да разговараат за изборниот процес, односите со јавноста и комуникацијата со граѓаните, како и за можностите за поголемо вклучување на младите во политиката и демократските процеси.

Непосредниот контакт со пратеникот и стручната служба им овозможи на студентите да ги поврзат теоретските знаења со практичното функционирање на институциите и да го продлабочат разбирањето за улогата на Собранието во демократското општество.

Учеството во вакви едукативни активности придонесува за развивање на критичкото размислување, проширување на академските знаења и поттикнување на студентите да бидат информирани и активни учесници во општествениот живот.