Во саботата, 25-ти октомври 2014 год со почеток од 18:00 часот, светиниколската публика ја имаше ретка можност да ги слушне најпопуларните руски песни и романси во големиот амфитеатар на Меѓународен Славјански Универзитет „Г. Р. Державин“ – Свети Николе испеани од Хорот на Валаамскиот манастир од Русија. Хорот е на неговата прва турнеја низ Македонија и досега ги посети Прилеп, Битола и Свети Николе, а денес ќе настапи во Скопје.

Свечениот машки хор на Валаамскиот манастир од Русија, во прекрасниот и преполн амфитеатар на Меѓународниот Славјански Универзитет во Свети Николе, одржа концерт на духовна музика кој многубројната публика ќе го памети како исклучителен музички и културен настан. По многу нешта единствен, а пред се по квалитетот на вокалите и по стилот на исполнување на песните, кои се дел од богатата православна црковна и духовна ризница, овој хор ги исполни срцата и душите на публиката со целовечерниот концерт.

Во составот на хорот влегуваат познати професионални музичари од Санкт Петербург, дипломци на Санктпетербуршката хорска школа во Државната академска капела “М.И.Глинка” и Санктпетербуршкиот државен конзерваториум, „Н.А.Римски-Корсаков”, Владимир Милер (бас-профундо), солист на Бољшој театар, Михаил Круглов, (бас-профундо), Дмитриј Попов (контра-тенор), Александар Бордак (тенор), како и други дипломирани и афирмирани пејачи, а со хорот диригираше Алексеј Жуков.

Она што буквално ја крена публиката на нозе беше моментот кога хорот започна со изведбата на „А бре, Македонче“. Прекрасната изведба на оваа македонска песна беше проследена со громогласен аплауз од страна на публиката.

Покрај настапот на хорот, истата вечер во Меѓународниот Славјански Универзитет – Свети Николе беше отворена и изложбата насловена „Светски пожар“, посветена на 100-годишнината од Првата светска војна, а изготвена од Здружението на Руската дијаспора во Македонија.

На манифестацијата беше присутен и Амбасадорот на Руската Федерација во Р. Македонија, Н. Е. Олег Шчербак, како и проф. д-р Ирина Бондар, претставник на Северо-Кавкаскиот Федерален Универзитет од Русија.