На 1 октомври 2025 година во свечената сала на Офицерски дом во Битола, паралелно со кампусот во Свети Николе, се одржа првиот академски час за новата генерација студенти на Меѓународен Славјански Универзитет во Битола. Настанот беше одбележан со присуство на бруцошите, нивните блиски и академскиот кадар, создавајќи инспиративна атмосфера на нов почеток.

Свеченоста беше модерирана од Марјан Ѓоргиевски, а присутните имаа можност да ги слушнат обраќањата од раководството на универзитетот и факултетите. Во име на раководството, свое обраќање имаше проректорката проф. д-р Павлина Стојанова, која им посака на студентите успешна академска година.

Во продолжение, добредојде им упатија деканката на Факултетот за психологија, проф. д-р Анита Ристеска, продеканката на Факултетот за економија и организација на претприемништво, проф. д-р Јулијана Силјаноска, деканката на Факултетот за технички науки и информатика, проф. д-р Цветанка Митреска, како и продеканката на Факултетот за правни науки, проф. д-р Марија Гроздановска.

На самиот настан, новите студенти ги добија своите индекси, што претставува симболичен почеток на нивното академско патување. Предавањата официјално започнуваат на 2 октомври.

Меѓународен Славјански Универзитет со радост ја отвора новата академска година и им посакува на сите студенти многу успех, инспирација и личен напредок.